නව අවුරුදු උදාව සැමරීම කාගේත් උනන්දුව
ඔස්සේ උදෑසන සිදු විය. දිසාපතිතුමා හා අතිරේක දිසාපතිවරුන්,අනෙකුත් මාණ්ඩලික
නිළධාරින්, ඇතුලත් සියලු සේවකයින් මන බඳනා ලීලයෙන් නැවුම්ව සිටින දිනයන් අතර වසරේ
ආරම්භක දිනය ප්‍රමුඛ උදාර දිනයකි.සියල්ල කරන්නට ඉඩ දී ඒ කෙරේ කාටත් නොදැනෙන ලෙස පතුලට කිමිද අවධානය
දෙන දිසාපතිතුමා, කෙනෙකුට අමුතුය. තව අයට සොඳුරුය තව අයට දිමුතුය. ඒ සිතුම් එක්
එක් මනු සිත් හි මට්ටම්, මානයන් අනුව සිදුවේ.
පිරුණු මල් වට්ටිය දිසාපතිතුමාගේ දෝත
මතය.සියලු සේවකයෝ එයට අත ගැසූ පසු ප්‍රතාපවත් නුග රුක් හි පාමුල පිහිටා ඇති ශාන්ත
බුදු රුව අභියස තැන්පත් කළේ, දිසාපති ආර්.එම්.වන්නිනායක මහතා විසිනි. සේවකයන්
පිරිවරා පහන් දැල්වූයේ ඉන් අනතුරුවයි. නව වසරේ අනෙක් සිහින ගැන, ඒවා සැබෑ කර ගන්නා
සැටි පහන් දල්වන මොහොතේ සෑම දෙනාගේම සිතට ගන්නට ඇත. උතුරු මධ්‍යම දිසාවේ ප්‍රධාන
සංඝනායක පූජ්‍ය නුගේතැන්නේ පඤ්ඤානන්ද නා හිමිපාණන් වහන්සේගේ ආශිර්වාදය ලැබිණි.
නාහිමි කළ අනුශාසනයෙන් කියවුනේ රාජ්‍ය සේවකයාගේ චිත්ත ප්‍රීතිය රැඳී තිබෙන්නට නම්
ජනතාශ්‍රය හරහා ජනී ජනයා තමාගෙන් බලාපොරොත්තු වන සේවාව රාජ්‍ය සේවකයා විසින් මනාව
සිදු කළ යුතු බවයි. උතුම් වන්නේ මුදල් නොව සේවයයි. මතකයට නඟමින් මියෙන තුරු තෘප්ත
විය හැක්කේ මුදලින් නොව කළ සේවයේ තරම සිහිගන්වමින් බව උන්වහන්සේ අවධාරණය කළහ. සංවර්ධනාභිමුක
ගමනක යන්නට සහය දක්වන්නට රුචි රාජ්‍ය සේවකයින්ට මෙය තව තවත් උත්තේජනයකි. තම සේවයේ
දිග පළල නොදන්නා හරසුන් සේවකයින්ට සිය මානසිකත්වය ධනාත්මක කර ගැනීමට
පූර්වාදර්ශයකි.
කච්චේරියේ බොහෝ හදවත් සෞන්දර්ය මානය ස්පර්ශ
කිරීමෙන් ඔබ්බට ගොස් එහි කිමිදෙන්නට ප්‍රිය කර ය.“සංජනනී” නමින්
පසුගිය වසරේ කළ සෞන්දර්යාත්මක වැඩසටහන පමණක් සිහි කිරීමෙන් ඒ බව ඔප්පු වේ.කච්චේරියේ නිලධාරින් සදහා පැවති
එම ගීත ගායනා තරගාවලියේ දී ජය පැතූවන්ගේ ජය ලැබූ අය ඒ ජයග්‍රාහී ගීත නව වසරේ
ආරම්භයේ දී ගායනා කිරීම, නව වසර ආන්දෝලනාත්මකව අරඹන්නට රුකුලක් සැපයීය.
අනුරාධපුර
පුන්‍ය භූමිය තුළ සේවය කරන්නට ලැබීම කාගෙත් භාග්‍යකි. ඒ බව දිසාපතිතුමා නිතර
කියයි. පෙර පින නිසා ලැබෙන අවස්ථාවක් සේ එතුමා එය දකී. එමෙන්ම මේ භාවය කළ සිට
පුරවා ගන්නට ද තෝතැන්නකි, අනුරාධපුර ය. සුපුරුදු ලෙස අටමස්ථානය ඇතුළු පන්සල් වෙත
ගොස් නායක මා හිමිපාණන්වහන්සේගේ ආශිර්වාදය ලබා ගැනීමද දිසාපතිතුමා විසින්
සිරිත් පරිදි සිදු කරන කටයුත්තකි. ඒ සමඟ අපට සතුටුව යත හැකි නිසා වසරේ කටයුතු සඳහා
නැවුම් උත්තේජනයක් අපට ද ලැබේ. මෙදින සිදුවීම් මාලාවට අදාල ඡායාරූප පෙළගැස්ම පහතින් දක්වා ඇත.
